Plot
E ti, xa estiveches na sala dos espellos?
A que responden as escenificacións da menor das Kardashian ante o black mirror? Por que milleiros de persoas viven pendentes do seu Instagram? Que pasou neses tres días en que Marilyn Monroe foi fotografada constantemente no hotel Bel Air? Por que a emperatriz Sissi tiña unha sala dos espellos? Que lle di o espelliño á madrasta de Brancaneves?
Mordaz e intelixente, Strömquist reflexiona nesta banda deseñada sobre até que punto a ditadura da imaxe e do espello (en todas as súas formas) minou o modo como nos relacionamos co noso corpo e, en especial, cos corpos das mulleres. Igual ca n’A froita do coñecemento, Strömquist ofrécenos Na sala dos espellos unha maridaxe perfecta de referentes históricos e da cultura pop co apoio teórico de grandes figuras do pensamento como Susan Sontag ou Byung Chul-Han.
A banda deseñada máis recente de Liv Strömquist reflexiona sobre a nosa obsesión pola autooptimización, a imaxe e o aspecto físico (e, sobre todo, polo das mulleres), así como a súa relación coas novas tecnoloxías.
Dende a emperatriz austríaca Sissi até as Kardashian, Liv detense a observar como os espellos, esas ferramentas puídas, domean o mundo actual a base de dopamina e likes, xa que… acaso o smartphone non é unha nova versión do espello da madrasta?